![042224 Hataw Frontpage](https://hatawtabloid.com/wp-content/uploads/2024/04/042224-Hataw-Frontpage-Army-Major-pinasok-sa-sariling-opisina-pinagbabaril-patay.jpg)
ni MICKA BAUTISTA
ISANG opisyal ng Philippine Army ang pinasok sa loob ng kanyang opisina at pinagbabaril ng nag-iisang lalaking sakay ng motorsiklo sa Brgy. Marungko, sa bayan ng Angat, lalawigan ng Bulacan, nitong Sabado ng hapon, 20 Abril.
Ayon sa ulat na ipinadala kay P/Col. Relly Arnedo, Provincial Director ng Bulacan PPO, kinilala ang biktima na si Major Dennis Moreno, 41 anyos, may asawa, miyembro ng Philippine Army na kasalukuyang nakatalaga sa AFP-RESCOM General Headquarters, at residente sa Brgy. San Roque, sa nabanggit na bayan.
Ayon sa salaysay ng sekretarya ng biktima na nakasaksi sa insidente, dakong 5:45 pm kamakalawa habang nasa loob ng kanyang opisinang SEM278 Enterprise sa Brgy. Marungko si Major Moreno, nang biglang pasukin ng hindi kilalang suspek saka pinaulanan ng bala gamit ang maikling baril.
Agad isinugod ang biktima sa Twin Care Hospital upang malapatan ng lunas ngunit idineklarang wala nang buhay ng attending physician na si Dr. Sherelyn Trandia.
Samantala, mabilis na tumakas ang suspek sakay ng isang itim na motorsiklo patungo sa hindi malamang destinasyon na ngayon ay sentro ng manhunt operation ng pulisya.
Kasunod nito, nagpatupad ng flash alarm ang Bulacan PNP at nagsagawa ng dragnet operation upang matunton ang suspek habang iprinoseso ng Scene of the Crime Operatives (SOCO) team mula sa Regional Forensic Unit 3 ang pinangyarihan ng krimen at nangalap ng ebidensya.
Bumuo rin ang Bulacan PNP ng special investigation task group upang imbestigahan ang insidente at hinimok ang publiko may alam na impormasyon tungkol sa insidente na lumapit at tumulong sa isinasagawang imbestigasyon.