Sylvia kay Zanjoe—hulog ng langit kay Ria

SHOWBIZ KONEK
ni Maricris Valdez Nicasio

TIYAK na sobrang na-touch o hindi man naluha si Zanjoe Marudo sa napakagandang mensahe ng kanyang biyenang si Sylvia Sanchez nang mag-post ito sa kanyang social media account pitong araw matapos ang kasal nila ni Ria Atayde. 

Tagos  sa puso ang napakagandang mensahe ni Sylvia noong Easter Sunday kay Zanjoe dahil pinuri niya ito at binanggit ang mga katangiang nagustuhan niya rito.

Ani Sylvia, isang hulog ng langit at napakagandang regalo para sa kanyang anak na si Ria si Zanjoe. Kalakip ng makabagbag damdaming mensahe ang ilang wedding pictures ng dalawa na ang pagkakaalam nami’y may hinintay na picture si Ibyang (tawag kay Sylvia) kaya natagalan ang pagpo-post niya.

Sinabi rin ni Sylvia na “napakabuting asawa” ni Zanjoe.

Panimula ni Sylvia, “Walang hanggang pasasalamat Panginoong JESUS dahil binigyan mo ng napakagandang regalo ang aking si Potpot Sophia Atayde ng isang napakabuting asawa, marespetong bata, mapagmahal na kapatid, anak at napakaresponsableng tao.”

At tila ba manghuhula ang aktres dahil naramdaman agad niyang magkakatuluyan ang dalawa.

“Unang araw ko kayong nakitang magkasama alam ko nang kayo ang magkakatuluyan. Naramdaman ko yan. Mother instinct (heart emoji).”

Agad naman din nilang tinanggap ang aktor sa kanilang pamilya, sabi nga ni Ibyang at sinabing ito ang ikatlong lalaking anak nila. Ang una’t pangalawa ay sina Cong Arjo at ang bunsong si Xavi.

“Zanjoe Marudo, mula noon welcome ka na sa pamilya namin (laughing emoji). ginawa mo ng official noong 3-23-24.

“Sabi nga ng Daddy @xaviiart (Art Atayde) mo sa speech nya, ang aming pangatlong lalaking anak.

“Kaya officially welcome to the Family Z anak (heart emoji).”

Hindi rin itinago ni Sylvia kung gaano siya kasaya para kina Ria at Zanjoe.

“Ang saya saya ng puso ko (praying hands emoji).

“I love you both so much Mr&Mrs Zanjoe Marudo.

“This is truly a Happy Easter Sunday to remember (praying hands and red heart emoji).” 

Ikinasal sa pamamagitan ng intimate civil wedding sina Ria at Zanjoe noong March 23, officiated by Quezon City Mayor Joy Belmonte. Present sa kasal ang mga magulang ni Ria na sina Sylvia at Art Atayde gayundin ang mga kapatid nitong sina Congressman Arjo Atayde  kasama ang asawang si Maine Mendoza, Xavi,at Gela Atayde. Ang tatay naman ni Zanjoe na si Zosimo Marudo, at mga kapatid na sina Zosanne, Zjaye, Zaniejean, at Zandro kasama ang asawa nitong si Evangeline ang sa aktor.