Insidente ng pagkalunod tumaas
“BAYWATCH COPS” ITINALAGA NG PRO3 PNP

IPINAHAYAG ni PRO3 PNP Regional Director P/BGen. Jose Hidalgo, Jr., ang paghikayat sa publiko na mag-ingat sa paglangoy sa mga beach at resort noong Sabado, 30 Marso.

Batay sa mga ulat mula sa Regional Tactical Operations Center, mula Enero hanggang sa kasalukuyan, naitala ang kabuuang 30 insidente ng pagkalunod kung saan 27 katao kabilang ang ilang mga bata ang namatay kumpara sa mga talaan noong nakaraang taon mula Enero hanggang sa katapusan ng summer vacation noong Mayo na mayroong 45 na mga insidente ng pagkalunod kung saan 42 ang namatay.

Karamihan sa mga insidente ng pagkalunod ay nangyari sa mga dagat habang ang iba ay nangyari sa mga ilog.

Pahayag ni P/BGen. Hidalgo sa publiko, “Kung plano mong lumangoy sa isang beach, kailangan mong tiyakin na ikaw ay kasama ng mga bihasang manlalangoy.”

Ipinunto niya ang kahalagahan para sa mga magulang o tagapag-alaga na manatiling mapagbantay, dahil ang kanilang mga anak ay maaaring makipagsapalaran sa mga pool o beach na walang kasama.

Hinikayat din niya ang pagbabasa ng mga signage sa mga dapat at hindi dapat gawin sa ilang mga beach at sundin ang mga paghihigpit kung mayroon man.

Pinayuhan ng Regional Director ang mga magulang at iba pang taong nagbakasyon sa paglangoy na alamin ang lokasyon ng mga first-aid station at police assistance desk.

Kaugnay nito, ipinahayag ni P/BGen. Hidalgo na hindi bababa sa 1,500 PNP personnel ang namamahala sa police assistance desks sa iba’t ibang bahagi ng rehiyon partikular sa mga kalsada at tourist destinations.

Gayundin, iniutos niya ang pagtaas sa deployment ng mga tauhan na sinanay sa Water Search and Rescue Teams (WASAR) sa mga beach at resort upang madagdagan ang deployment ng mga lifeguard at matiyak ang kaligtasan ng publiko.

Hinihimok ng Central Luzon Top Cop ang publiko na mag-ingat lalo na sa paglalakbay sa iba’t ibang destinasyon.

Ang mga tip sa kaligtasan ay ibinigay din sa mga manlalakbay at turista na sumasakay sa pampublikong transportasyon at bumibisita sa mga simbahan, beach, at resort. (MICKA BAUTISTA)