HATAW! D'yaryo ng Bayan hatawtabloid.com
ALAM MO NA!
ni Nonie Nicasio
MATAPOS ang Mahal na Araw, nagpulong ang mga pangunahing komite ng nalalapit na Grand Santacruzan sa opisina ng SWITCH FIBER, pangunahing sponsor sa nasabing okasyon.
Kasama sa pulong sina Chairman Gil ‘Aga’ Anore, SK Chairman Carl Antiporda, mga SK Kagawad na sina Eriz Christian Barretto, Karl Mallari, Princess Anore Aquino, Erick Tajanlangit, pati na rin si GMA Kapuso at Event Coordinator na si Gomer O. Celestial.
Napagkasunduan na gawing Inter-Barangay – Mainland ang mga lalahok sa Santacruzan Alay sa “Pista ng Krus.”
Dahil dito, ang bayan ng Binangonan, Rizal ay isa sa itinuturing na mayaman sa kultura at tradisyon. Isa sa mga kaugalian ng mga taga-Binangonan ang paggunita sa pagkakatagpo sa Mahal na Krus sa Brgy. Libid na matatagpuan ang Kalbaryo, na lalong pinapaayos at pinapaganda.
Ang pagdiriwang na ito ay nagiging pasyalan ng mga lokal at dayuhang turista, na magsasadya rito para sa siyam na araw na panalangin (lutrina) bilang parangal sa Krus. Ang tema ng pagdiriwang ay Kultura, Kabataan, Pag-ibig, at Pasasalamat.
Sa magaganap na pagdiriwang sa Mayo 5, 2024, sa ganap na ika-5 ng hapon, bahagi ng nasabing pagdiriwang ang Biblical Grand Santacruzan 2024. Pangungunahan ng maganda at mahusay na Kapuso actress na si Ysabel Ortega, bilang pangunahing Reyna Elena. Gagamitin ni Ysabel ang gown na likha ni Patricia Bella Sison.
Ito ay sa pangangasiwa ng Sangguniang Barangay ng Libid, Sangguniang Kabataan ng Libid, at SWITCH FIBER.
