Marian sa bagong serye: Gusto kong maging proud ang mga anak ko sa akin

COOL JOE!
ni Joe Barrameda

AFTER five years,  muling mapapanood si Marian Rivera sa isang serye via GMA 7‘s My Guardian Alien, na siya mismo ang gumaganap na alien.

Sa media conference, ipinaliwanag ni Marian kung bakit ito ang napili niyang gawing serye, na may halong fantasy, after magpahinga sa paggawa ng serye.

Sabi ni Marian, “Noong unang i-present ito sa akin ng GMA, ito talaga ‘yung napusuan ko, na sabi ko ‘ay ang ganda nitong gawin.’ Kasi bago sa akin at sure ako na mapapanood ng mga anak ko. Kasi, gusto ko gumawa ng isang serye, na kayang panoorin ng mga anak ko, at magiging proud ako.”

Patuloy niya, “Sabi ko nga, ito na siguro ‘yung time sa buhay ko, na sa tuwing may gagawin ako, gusto kong maging proud ‘yung mga anak ko sa akin. Ito na nga ‘yun.

“Parang ayoko na, na hahanap pa ako ng ibang kuwento. Kasi the mere fact, na sinabi nila sa akin ito, na original ito, na nilikha ang kuwento na ito. Tapos sabi ko, parang may magandang aral na mapupulot ang mga batang makakapanood nito, parang wala akong karapatan, or wala akong ni katiting na nasa isip ko, na tanggihan talaga.”

Ayon pa kay Marian, masasabi niya na ang role niya rito ang pinakamadali sa lahat ng nagawa niya.

“Bukod kasi sa maganda ito, sa sobrang dali, wala akong lines, kasi nga alien ako,” ang natatawang sabi pa ng misis ni Dingdong Dantes.

“Sabi ko nga kay Direk, mas mahirap pala na walang lines, kaysa nagsasalita kasi, ang hirap talaga. Hindi ka maka-react na may nangyayari, kailangan hindi ka muna mag-react, puro kamay, puro ulo.  

“Parang puro ganoon noong una, pero siyempre habang nagtatagal, nagkakaroon na siya ng pakiramdam. Nalalaman niya na kung ano ang ibig sabihin ng tao. So unti-unti nagkakaroon siya ng mga reaction,” aniya pa.

Si Gabby Concepcion ang kapareha ni Marian at puring-puri niya ang beteranong aktor.

“Napakagaang katrabaho ni Kuya (Gabby). Parang kumbaga sa pagkain, walang itulak kabigin sa kanya. Napakabait niyang katrabaho. At saka ‘yung mga moment namin, mahilig siyang mag-joke, eh.

“So, ginagawa niyang light talaga ‘yung mga pagkakataon.

“Tapos may mga pagkakataon na naa-appreciate ko siya, na pinag-uusapan namin ‘yung mga buhay-buhay namin. Nakita ko kung gaano niya kamahal ‘yung pamilya niya,  at ‘yun ang naa-appreciate ko sa kanya. Napakabuti niyang tao,” papuri pa ni Marian kay Gabby.

Mapapanood na ang serye simula sa April 1 sa GMA Prime. Mula ito sa direksiyon ni Zig Dulay.