HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
NAGPAKATOTOO lamang siguro si Albie Casino nang tanungin ito sa presscon ng bagong Vivamax Original movie niyang Kasalo kung nakiramay ba siya kay Andi Eigenmann sa biglaang pagkamatay ng ina nitong si Jaclyn Jose noong Marso 2.
Sa presscon ng Kasalo noong Sabado sa Viva Cafe na mapapanood na sa March 26 sa Vivamax kasama sina Vern Kaye at Mia Cruz, walang kagatol-gatol na sinabi ni Albie na alam niyang hindi siya welcome sa burol ng namayapang aktres kaya bakit pa raw siya pupunta.
Kaya siguro ganito ang sinabi ni Albie ay dahil hanggang ngayon hindi pa rin sila okey ni Andi matapos iturong siya ang ama ng nooy ipinagbubuntis pa lamang na si Ellie na pagkaraan inamin ni Jake Ejercito na siya ang tunay na ama ng bata.
Kaya nang matanong si Albie sinabi nitong, “Unang-una, I just wanna say rest in peace Ms. Jane (tunay na pangalan ni Jaclyn), at saka condolences sa lahat ng tao na nagmamahal sa kanya. Pero hindi naman ako apektado roon.”
Idinugtong pa nitong, “I don’t think my presence would be welcome there, so bakit ako makikiramay, ‘di ba?”
Sa kabilang banda, ‘bumigay‘ na talaga si Albie at sumabak sa matitinding eksena kasama sina Vern at Mia. Talaga namang bigay na bigay at tiyak na marami ang mapapa-wow! sa mga maiinit na eksena ng tatlo.
Ang Kasalo ay ukol sa mga nakakalokang karanasan ng mga pasahero sa mga ride-hailing company mobile app. Ito ay idinirehe ni HF Yambao at mapapanood na simula March 26, sa Vivamax.
