HATAW! D'yaryo ng Bayan hatawtabloid.com
ARESTADO ang may kabuuang 18 indibiduwal, pawang mga lumabag sa batas sa mga operasyon ng pulisya laban sa kriminalidad na isinagawa sa iba’t ibang lugar sa lalawigan ng Bulacan hanggang nitong Miyerkoles ng umaga, 20 Marso.
Sa ulat na natanggap ni P/Col. Relly Arnedo, Provincial Director ng Bulacan PPO, nagresulta sa pagkakadakip sa 13 pinaniniwalaang mga talamak na tulak ang serye ng buybust operations na ikinasa ng Station Drug Enforcement Unit ng Meycauayan CPS, Sta. Maria, Marilao, Guiguinto, San Ildefonso, at Plaridel MPS.
Nakompiska sa operasyon ang kabuuang 24 plastic sachet ng hinihinalang shabu, may timbang na 14.97 gramo at tinatayang nagkakahalaga ng P101,836; drug paraphernalia, at buybust money.
Gayondin, sa serye ng manhunt operations na inilatag ng tracker teams ng magkasanib na mga operatiba ng Bulacan 2nd PMFC at San Jose Del Monte CPS; Bulacan 1st PMFC, RMFB 3, Balagtas, at Bocaue MPS; RMFB 3; at Sta. Maria MPS, dinakip sa bisa ng warrant of arrest ang lima kataong pinaghahanap ng batas.
Pahayag ni P/Col. Arnedo, ang pagsisikap ng pulisya ay binibigyang-diin ang hindi natitinag na dedikasyon nila sa pagtataguyod ng kaligtasan ng publiko at paglaban sa mga krimen at iba pang ilegal na mga gawain sa loob ng lalawigan. (MICKA BAUTISTA)
