HATAW! D'yaryo ng Bayan hatawtabloid.com
NAGDIRIWANG ang lokal na pamahalaang lungsod ng Las Piñas sa matagumpay at napakahusay na kontribusyon ng ilang mahahalagang opisyal kasabay ng seremonya ng pagtataas ng watawat ng bansa sa bisinidad ng city hall kahapon.
Pinuri nina Vice Mayor April Aguilar at DILG-NCR Las Piñas City Director Patrick John Megia si City Chief of Police, Colonel Sandro Tafalla at kanyang team dahil sa katangi-tanging liderato sa Las Piñas City Police Station bunga ng matagumpay na police operations na nagbigay ng kaligtasan at kaayusan sa lungsod.
Ginawaran din ng Bureau of Fire Protection (BFP) ang Barangay Almanza Uno na nagkampeon sa public safety preparedness sa idinaos na 11th Inter-Barangay Fire Olympics nitong 16 Marso.
Ang naturang parangal ay sumasalamin sa pangako sa komunidad sa pagpapabuti ng pulisya sa kanilang pagtugon at kakayahan ukol sa kaligtasan sa sunog at kung paano ito maiiwasan.
Samantala, binigyang pagkilala ni Mayor Imelda Aguilar ang Business Process and Licensing Office (BPLO) sa pamumuno ni Ginoong Wilfredo Garlan dahil sa magagandang puna na natanggap mula sa Las Piñeros para sa mabisa at epektibong mga serbisyo ng naturang tanggapan. (EJ DREW)
