Rio sa wagas na paghagulgol — ‘di ako makabitaw sa napakataas na emosyon

RATED R
ni Rommel Gonzales

NAGBIGAY ng paglilinaw si Rio Locsin tungkol sa nag-viral niyang video na wagas ang paghagulgol habang kayakap at inaalo ng Black Rider co-star niyang si Ruru Madrid.

May mga netizen na mema lamang ang nag-akusa agad na kesyo wala man lang daw medic sa set ng taping na tumulong sa aktres kahit na tila hirap itong huminga.

Sa statement na inilabas ng aktres ay ibinahagi nitong nadala lamang siya sa mabigat na eksenang drama kaya kahit cut na at hindi na nagro-roll ang kamera ay hindi pa niya mapigilan ang kanyang emosyon.

Lahad ni Rio, “Tama po kayo, hindi ako nakabitaw agad sa napakataas na emosyon na kinakailangang ibigay sa eksena kasi apat na tuloy-tuloy na eksena na maraming namatay at isa-isa naming nakikita.

“May mga medic kami sa set, may ambulance rin. Kaya hindi totoo na walang medic na tumutulong, nagkataon lang na hindi ko naman talaga kinailangan na magpa-medic noong oras na ‘yon, but anytime, andiyan lang sila.

“Hindi rin totoo na inatake ako ng hika, wala po akong hika.”

Hindi rin daw siya pinabayaan ni Ruru, inalalayan siya ng aktor at pinakalma.

“Hindi talaga ako iniwan ni Ruru pagkatapos ng mabibigat naming eksena.”

At sa bigat ng naturang eksena, hiling pa ni Rio na sana raw ay maramdaman ito ng mga manonood kapag napanood nila ang mga eksena.

“Sa abot ng aming makakaya, kung ano ang nararamdaman namin sa eksena, kami ni Ruru, parehong damdamin at puso ang ipinaaabot namin sa mga manonood, na nawa’y maipaabot namin ‘yung emosyon na nararamdaman namin para sa mga eksena,” saad pa ng aktres.