HATAW! D'yaryo ng Bayan hatawtabloid.com
MAYROON nang72 pumping stations sa Navotas, kasunod ng pagpapasinaya sa tatlo pa na matatagpuan sa Judge Roldan St., Brgy. San Roque, Daanghari St., Brgy. Daanghari, at Maliputo St., Brgy. NBBS Dagat-Dagatan.
Pinangunahan nina Mayor John Rey Tiangco at Cong. Toby Tiangco ang blessing at inauguration ceremony sa tatlong pumping stations.
“Noon, kapag nababanggit ang Navotas, bukod sa isda ay baha ang naiisip ng mga tao. Malaking perhuwisyo ang dulot nito dahil apektado hindi lang ang pang-araw-araw nating pamumuhay kundi pati ang ating kabuhayan at kalusugan. Kaya naman sinimulan ni Cong. Toby at itinuloy-tuloy natin ang pagtatayo ng mga pumping stations para maiwasan ang pagbaha,” ani Mayor Tiangco.
“Pakiusap lang po na alagaan nating mabuti ang ating mga pumping station. Isipin natin na pag-aari natin ito. Kung ganyan tayo mag-isip, siguradong sisikapin nating lagi itong maayos at gumagana,” dagdag niya.
Samantala, pinaalalahanan ni Cong. Tiangco ang mga Navoteños na maging responsable sa pagtatapon ng basura.
“Malaki po ang ambag ninyo para maiwasan natin ang pagbaha sa ating lungsod. Maayos na makahihigop ng tubig ang bombastik kung walang basurang nakabara rito. Kaya maging responsable po tayo sa pagtatapon ng basura,” paalala ni Cong. Tiangco.
Dumalo rin sa inagurasyon sina Vice Mayor Tito Sanchez, mga konsehal ng lungsod, barangay chairpersons, mga department heads, at mga kawani at opisyal mula sa Department of Public Works and Highways (DPWH). (ROMMEL SALES)
