HATAW! D'yaryo ng Bayan hatawtabloid.com
ANIM na nagtutulak ng droga, dalawang wanted na kriminal at limang may paglabag sa batas ang sunod-sunod na naaresto ng Bulacan police sa iba’t ibang operasyon na isinagawa sa lalawigan hanggang kahapon.
Batay sa ulat na isinumite kay PCOL RELLY B ARNEDO, Provincial Director ng Bulacan PPO, sa magkasunod na buy-bust operation na ikinasa ng Station Drug Enforcement Unit (SDEU) ng Angat, San Jose Del Monte, at Guiguinto C/MPS ay anim na durugistang tulak ang naaresto.
Nasamsam sa operasyon ang dalawampung plastic sachet ng hinihinalang shabu at isang medium transparent plastic sachet na naglalaman ng marijuana na may Standard Drug Price (SDP) na Php 39,040, assorted drug paraphernalia at buy-bust money.
Samantala, ang tracker team ng Santa Maria at Obando Municipal Police Station ay naaresto ang dalawang wanted na kriminal na matagal ng nagtatago sa batas.
Kinilala sila na sina alyas Erick, 20, residente ng Santa Maria, Bulacan arestado dahil sa Attempted Homicide at alyas Romy, 44, residente ng Sta. Mesa St., Sampaloc, Manila dahil sa paglabag sa (RA 7610) 2 counts ng Statutory Rape.
Sa pagresponde nama ng mga awtoridad ng San Jose Del Monte, Bulakan, at Marilao C/MPS sa iba’t ibang insidente ng krimen ay humantong sa pagkakaaresto sa limang personalidad na lumabag sa batas.
Kinilala ang mga ito na sina alyas Tony na inaresto dahil sa paglabag sa (RA 11313) Safe Space Act; alyas Hana para sa Pagnanakaw; at alyas Asja, alyas Jun-Jun at alyas Jefrey para sa Robbery. (MICKA BAUTISTA)
