Sunshine kinaiingitan hitsurang 20-anyos

HATAWAN
ni Ed de Leon

MARAMI raw ang nangba-bash kay Sunshine Cruz at nagsasabing hindi na bagay sa kanyang edad ang mga ipinagsusuot niyang damit, lalo na nang lumabas ang mga sexy lingerie niya na ginamit sa isang commercial.

Sinasabi iyan ng mga naninira kay Sunshine dahil ang batayan nila, dalaga na ang kanyang mga anak. Hindi nila matanggap ang katotohanan na kahit dalaga na ang mga anak ni Sunshine, napangalagaan niya ang kanyang sarili at mukhang dalaga pa rin. 

Kung titingnan mo naman talaga si Sunshine mukha siyang mga 20-anyos lang sa hitsura niya bagama’t ang ibang kasabayan niya noon ay mga mukhang pindangga na. Marunong kasi si Sunshine na mangalaga sa kanyang sarili. Una, hindi niya kinukunsumi ang sarili. Ikalawa, makikita ninyo hanggang ngayon nagpupunta siya sa gym para mapanatiling fit ang katawan. 

Hindi rin naman si Sunshine iyong makikita mong gaya ng iba na halos gabi-gabi nasa mga bar at club at nakikipagsayahan. Pagdating ng gabi nasa bahay na iyan at maagang matulog. Magtataka pa ba kayo kung bakit mukha pa siyang 20-anyos hanggang ngayon? 

Sa totoo lang TIta Maricris, masasabi naming sa lahat ng nakita naming artista, at ang tagal na namin sa industriyang ito wala nang gaganda pa kay Sunshine at sa artista noong si Marianne dela Riva.

Pero talagang ganyan naman basta maganda ka kaiinggitan ka.

Pero sino ba sa kanila ang masasabing sa ganoong edad ay kasing ganda pa rin ni Sunshine?