HATAW! D'yaryo ng Bayan hatawtabloid.com
ARESTADO ang isang drug peddler, isang wanted person at limang law breakers sa sunod-sunod na operasyon ng pulisya sa Bulacan kamakalawa, Pebrero 3.
Sa ulat na ipinadala kay PColonel Relly B. Arnedo, provincial director ng Bulacan PPO, nagkasa ng buy-bust operation ang Station Drug Enforcement Unit (SDEU) ng Calumpit Municipal Police Station na nagresulta sa pagkaaresto kay alyas Alex, 52, residente ng Brgy . Palimbang, Calumpit, Bulacan.
Nasamsam sa operasyon ang isang gramo ng hinihinalang shabu na may Standard Drug Price (SDP) na Php 6,800.00, iba’t ibang drug paraphernalia, at buy-bust money.
Dinala sa Bulacan Provincial Forensic Unit (PFU) ang mga nakumpiskang ebidensiya para sa kaukulang pagsusuri habang ang reklamong kriminal para sa paglabag sa R.A. 9165 laban sa suspek ay inihahanda na para sa pagsasampa sa korte.
Samantala, nagsagawa naman ng manhunt operation ang tracker team ng Bulakan Municipal Police Station na nagresulta sa pagkakaaresto kay alyas Jho, 52, residente ng Brgy. San Jose, Bulakan, Bulacan na may kasong paglabag sa Section 29 ng Real Estate Service Act of the Philippines (RA 964).
Bukod pa rito, rumesponde ang mga awtoridad ng San Miguel MPS at San Jose Del Monte CPS sa iba’t ibang insidente ng krimen na humantong sa pagkaaresto sa limang (5) law breakers na sina alyas Jericho, alyas Aldrin, at alyas Wilmark, pawang mga residente ng San Miguel, Bulacan, arestado dahil sa Theft (San Miguel MPS), at alyas Edgardo at alyas Evangeline for adultery (SJDM City PS).
Ang mga naarestong suspek at akusado ay kasalukuyang nasa kustodiya ng kani-kanilang arresting unit/station para sa tamang disposisyon.
Ayon kay PD Arnedo, ang tagumpay ng mga operasyong ito ay binibigyang-diin ang kanilang dedikasyon at pagiging epektibo sa paglaban sa mga krimen na may kaugnayan sa droga at pagdakip sa mga nagkasala sa batas. (MICKA BAUTISTA)
