HATAW! D'yaryo ng Bayan hatawtabloid.com
RATED R
ni Rommel Gonzales
NAGULAT kami sa Facebook post ni Katrina Halili noong Lunes, January 29.
Larawan ng isang lalaking nakatalikod na tila nasa madilim na kagubatan at naglalakad sa direksiyon ng isang liwanag at may caption na, “Ang daya mo love sabi mo aalagaan mo kami ni katie bakit iniwan mo kami.”
Dahil kaibigan namin ang aktres at ka-Facebook, nag-message kami agad sa kanya at tinanong kung sino ang namatay. Agad naman kaming sinagot ni Katrina at sinabing boyfriend niya ang pumanaw, “Kahapon, heart attack po,” na ikinabigla namin.
Hindi pa isinasapubliko ni Katrina ang relasyon nila ng non-showbiz boyfriend ay ikinuwento na niya dati sa amin na may karelasyon nga siya mula pa noong 2021.
Una ngang napabalita noon ay si John Lloyd Cruz daw ang karelasyon ni Katrina dahil may mga litratong naglabasan ang dalawa pero ang totoo, matalik na magkaibigan ang BF ng aktres at aktor. Ang tinutukoy namin ay si Jeremy Guiab na dating vice-mayor ng Wao, Lanao del Sur.
At ngayon nga ay labis ang kalungkutan at pagdadalamhati nina Katrina at John Lloyd, na sa edad na 53 ay pumanaw si Jeremy dahil nga sa atake sa puso.
Si Katie, na magtu-12 years old this year, ay ang nag-iisang anak ni Katrina. Si Kris Lawrence ang ama ni Katie.
Natatandaan pa namin sa kuwento ni Katrina dati uk sa kanyang boyfriend, nagustuhan niya ito dahil pareho sila ng ugali at bukod sa magkasintahan ay mag-bestfriend pa sila.
Sa guesting ni Katrina sa Fast Talk with Boy Abunda June of last year, ibinahagi niya na magkatuwang sila ni Jeremy sa pag-aalaga at pagpapalaki kay Katie.
Lahad noon ni Katrina, “‘Yung boyfriend ko ‘yung mas nagga-guide sa akin para alagaan ‘yung anak ko.
“Siya ‘yung mas nagtuturo sa akin kasi stubborn ako, ‘di ba? Stubborn din ‘yung anak ko, so medyo mahirap kaming dalawa.
“Minsan, nawawalan ako ng pasensiya, siya ‘yung mas kalmado. Tinutulungan niya ako talaga.”
Samantala, marami ang bumilib kay Katrina dahil sa pagiging professional nito na kahit nakaburol ang nobyo ay sumipot sa set at nag-tapingsa bago niyang serye sa GMA ang Mommy Dearest.
Kasalukuyan pa ring umeere ang Black Rider na main cast member din si Katrina.
Nakikiramay kami kay Katrina at sa pamilya ni Jeremy.
