Jean Kiley napa-‘oo’ ni Direk Njel de Mesa

HARD TALK
ni Pilar Mateo

SA mga mediacon ng Viva Films at Vivamax namin siya madalas na ma-encounter. 

Beautiful. Brainy. ‘Yun ang Jean Kiley na nakilala namin. Hanggang sa ilunsad siya ng recording outfit ng Viva dahil mahusay din palang kumanta.

Lagi naming tanong sa kanya noon, kung kailan ba siya sasalang sa mga pelikula ng Viva Films o Vivamax?

Tigas na tanggi ni Jean na sasalang siya sa mga sexy and daring scenes sa mga pelikulang hino-host niya ang mga mediacon.

Pero, pwede naman siyang umarte.

Kaya ang nakapagpasagot ng oo ni Jean para mag-emote sa pelikula eh, walang iba kundi ang producer, director ng NDM Studios at Vice-Chairman ng MTRCB, si Direk Njel de Mesa.

Kaya sa Hongkong Kailangan Mo Ako, sa isang full length buddy-girl comedy film, gagampanan nila ni Mayton Eugenio ang papel ng mag-bestfriends na nagbakasyon sa Hongkong pero ‘sangkaterbang mga kamalasan naman ang kinaharap. Mga travel horror stories ang kanilang ibabahagi na ikatutuwa ng mga manonood dahil siguradong makare-relate sila.

Sa tulong ng Hongkong Tourism Board, maraming magagandang lugar ang naikot ng production para kunan ang mga eksena na magpapakita sa istorya nina Mallory at Blair. Nagpapasalamat din ang cast sa suporta ng mga OFW natin sa nasabing bansa na nakasama sa ilang eksena sa pelikula.

Isasali muna ni Direk Njel sa film festivals abroad ang pelikula bago ipalabas dito. Nangangalampag na ang kanilang trailer sa kanilang official Facebook at YouTube channels. 

Way to go Jean Kiley and Mayton, whose surname rings a bell. ‘Am sure magaling din siyang magsayaw.