Starhunt at PBB alumni hahamunin ang galing sa pag-arte

HARD TALK
ni Pilar Mateo

BIGLAAN ang paanyaya. Debut! 

Pero hindi gown ang suot ng nagdiriwang ng kanyang ika-21 kaarawan. Lalaki, eh.

Si Dustine Mayores. Na hinangaan sa pagsali niya sa Starhunt sa ang Ultimate Bida Star: Boy Next Door na reality show sa ABS-CBN. 

Nakapasok din siya sa Bahay Ni Kuya. PBB Teen Ex-Housemate.

Maraming binuksan for Dustine ang pagka-panalong ‘yun. Sa kabila ng pagiging hati ng isip dahil sa mga dinaanang unos sa buhay.

Sa videos in his debut, ipinakita ang tinahak na landas ng binata sa kanyang buhay. Na ginusto nang sumuko sa buhay. Pero dahil na rin sa suporta ng mga nasa paligid, nakabangon agad sa pagkakadapa.

At aminado naman ang debutante na umako sa mga dinaanan niya para makarating sa kung nasaan siya ngayon.

Sa kanyang debut, kompleto ang mga nagmamahal sa kanya. Pamilya. Kaibigan. Kasama sa trabaho. 

Katuwaan sa kanyang 21 perfumes, 21 bills, 21 wishes, 21 shoots. 

Ano pa ba ang mahihiling niya?

Maka-pamilya si Dustine. Kaya nga nang magka-problema ang kanyang mga magulang, siya ang nawindang. Kaya ngayong umayos na ang lahat at umayon na sa kanilang kapalaran, hindi naman nawaglit ang focus ni Dustine sa mga mahal sa buhay, lalo na sa kapatid.

At isang magandang regalong natanggap niya sa pagdating ng proyektong hahamon na sa kanyang kakayahan bilang isang aktor.

Isang serye na isang closet gay (na anak ni Agot Isidro) ang kanyang gagawin. Bida na ba siya?

Luminaw na ang minsang nagdilim na mundo ni Dustine. At ipinapangako niyang hindi na siya susuko sa laban ng buhay!