Tonton walang alam sa hiwalayang Richard at Sarah

RATED R
ni Rommel Gonzales

“SA totoo lang, wala talaga akong alam,” umpisang sinabi ni  Tonton Gutierrez sa pag-uusisa sa kanya tungkol sa isyu ng hiwalayan ng kapatid niyang si Richard Gutierrez at misis nitong si Sarah Lahbati.

Pagpapatuloy pang lahad ni Tonton, “Nagkasama kami ni Richard noong binyagan ang anak ng isang kapatid namin, si Rocky, hindi namin napag-usapan, hindi ko siya tinanong.

“I gave him that respect, I wouldn’t want to ask, wala, so I have no idea.

“I have no idea kung ano man ‘yung…kung mayroon mang hiwalayan or whatsoever.”

Maging ang misis ni Tonton na si Glydel Mercado ay wala ring alam tungkol sa pangyayari.

“At saka sinabihan ako ni Glyds, ‘O mayroon akong nakita sa Facebook, ganito lumalabas na Richard or ano’, sabi ko, ‘Hindi ko alam eh.’

“Si Glydel was there also [sa binyagan], hindi naman namin tinanong, wala kaming tinanong sa isa’t isa, kahit sa mga kapatid namin na, ‘O totoo ba?’, wala.

“Respeto lang ‘yun eh. Wala, that’s why I have no knowledge or whatsoever, wala akong alam,” diin pa ni Tonton.

Latest film ni Tonton na ipinalabas sa mga sinehan noong December 13 ang Unspoken Letters na bida ang newbie na si Jhassy Busran.