Lotlot never nakialam sa personal na buhay ni Janine

RATED R
ni Rommel Gonzales

KAMI mismo ay walang makuhang impormasyon mula kay Lotlot de Leon tungkol sa mga isyu tungkol kina Janine Gutierrez at Paulo Avelino. Kahit never namang umamin sina Janine at Paulo kung may relasyon nga sila ay patuloy ang usap-usapan na break na ang dalawa.

Nagpapakatotoo lamang si Lotlot sa pagsasabing walang ikinukuwento sa kanya si Janine at si Lotlot, ni minsan, ay hindi nakialam o nagtanong tungkol sa personal na buhay ng kanyang mga anak. 

Ang katwiran ng aktres, malalaki na ang kanyang mga anak, may mga sarili na silang pag-iisip kaya alam na nina Janine, Jessica, Diego, at Maxine Gutierrez kung ano ang tama at kung ano ang mali.

Tulad din sa tanong kay Lotlot kung ano ang best advise sa kanya ng ama niya, ang Philippine Drama King na si Christopher de Leon, wala raw siyang maalala. Alam naman kasi ng daddy niya na nasa tamang pag-iisip si Lotlot kaya alam na niya kung paano haharapin ang kanyang personal na buhay at ang kanyang showbiz career.

Speaking of showbiz career, magkasama sina Lotlot at Papa Boyet sa When I Met You In Tokyo, official entry sa Metro Manila Film Festival ngayong December 25.

Female lead sa movie ang Star For All Seasons na si Ms. Vilma Santos at tampok din sina Cassy Legaspi at Darren Espanto, ang mag-asawang Tirso Cruz III at Lyn Cruz, Gabby Eigenmann, Kakai Bautista, John Gabriel, at Gina Alajar. Sa direksiyon nina Rommel Penesa at Rado Peru, mula ito sa JG Productions.