HATAW! D'yaryo ng Bayan hatawtabloid.com
NABISTO ang isang Chinese national na shabu ang tinanggap nitong food parcel na kanyang ipina-deliver nitong Sabado ng gabi sa Pasay City.
Kinilala ni Pasay City police chief P/Col. Mario Mayames, ang suspek na si Peng Cheng, nakatira sa Nasdake Bldg., sa Williams St., Barangay 33 sa nasabing lungsod.
Base sa ulat ng pulisya, dumating sa naturang lugar ang isang rider na kinilalang si Alberto Bonita, Jr., dala ang food parcel ng suspek dakong 8:30 pm.
Tinanggap ng lady guard na si April Joy Manglicmot, 24 anyos, nakatalaga sa naturang gusali.
Nang busisiin ng lady guard ang parcel ay nakita ang dalawang piraso ng sachet na naglalaman ng halos dalawang gramo ng hinihinalang shabu at paraphernalia na may katumbas na halagang P13,600.
Nakuha rin ang isang resealable plastic na naglalaman ng limang pirasong aluminum strip, isa sa sinabing paraphernalia sa paghithit ng shabu.
Sa ngayon, ay inihahanda ang kasong paglabag sa Republic Act 9165 o Comprehensive Dangerous Drug Act of 2002 laban kay Cheng. (GINA GARCIA)
