23 alkalde sa Bulacan suportado na maging highly urbanized city ang San Jose del Monte

Sa dalawang pahinang manifesto, ang 23 alkalde sa Bulacan ay  nagpahayag ng kanilang suporta para maging highly urbanized city ang San Jose del Monte sa Bulacan.

“Kaming mga halal na Punong Bayan ng iba’t-ibang munisipalidad at siyudad sa Lalawigan ng Bulacan ay nagkakaisa at buong tibay na sumusuporta sa Lungsod ng San Jose Del Monte, Bulacan bilang isang Highly Urbanized City (HUC) sa Lalawigan ng Bulacan,” nakasaad sa manifesto.

Binanggit ng mga local leaders ang Section 452 ng Republic Act No. 7160 o ang Local Government Code of 1991, na isinasaad ang “provides that the cities with a minimum population of 200,000 inhabitants as certified by the Philippine Statistics Authority, and with the latest annual income of at least 50 million based on 1992 constant prices, as certified by the Treasurer, shall be classified as highly-urbanized cities.”

Kabilang sa mga lumagda sa manifesto ay sina Plaridel Mayor Jocell Aimee Vistan-Casaje, Bocaue Mayor Eduardo Villanueva Jr., Angat Mayor Reynante Bautista, Balagtas Mayor Eladio Gonzales Jr., Baliuag Mayor Ferdinand Estrella, Bulacan Mayor Vergel Meneses, Bustos Mayor Francis Albert Juan, Calumpit Mayor Glorime Faustino, Doña Remedios Trinidad Mayor Ronaldo Flores, Guiguinto Mayor Agatha Paula Cruz, Hagonoy Mayor Flordeliza Manlapaz, Norzagaray Mayor Maria Elena Germar, Marilao Mayor Henry Lutao, Malolos Mayor Christian Natividad, Meycauayan Henry Villarica, Pandi Mayor Enrico Roque, Obando Mayor Leonardo Valeda, Paombong Mayor Mary Anne Marcos, Pulilan Mayor Ma. Rosario Ochoa-Montejo, San Ildefonso Mayor Fernando Galvez Jr., San Miguel Mayor Roderick Tiongson, Sta. Maria Mayor Bartolome Ramos, at San Rafael Mayor Mark Cholo Violago.

Itinakda ng Commission on Elections (Comelec) ang plebisito para sa kumbersiyon ng  SJDM bilang highly urbanized city sa Oktubre 30, 2023, kung saan araw na kasabay din ang Barangay at Sangguniang Kabataan Elections (BSKE).

Lahat ng nakarehistro at kuwalipikadong botante ng Bulacan para sa 2023 BSKE ay maaaring bumoto sa plebisito na magsisimula 7 a.m. hanggang 3 p.m., ayon sa Comelec.

Ipinahayag ng National Printing Office na kabuuang 2,092,147 official ballots ang nilimbag para sa plebisito para sa kumbersiyon ng SJDM.{Micka Bautista}