HATAW! D'yaryo ng Bayan hatawtabloid.com
NAKOMPISKA ng mga awtorodad ang mahigit sa 200 bilang ng mga nakamamatay na sandata, mga pampasabog, at iba’t ibang uri ng baril sa Central Luzon sa patuloy na pagpapatupad ng gun ban kaugnay sa nalalapit na Barangay at Sangguniang Kabataan Elections (BSKE) 2023 sa huling Lunes ng buwan, 30 Oktubre.
Ipinahayag ni PRO3 Regional Director P/BGen. Jose Hidalgoo, Jr., mula 28 Agosto hanggang nitong Linggo, 15 Oktubre, nasamsam ang may kabuuang 156 iba’t ibang uri ng mga baril at nakamamatay na sandata kabilang ang mga pampasabog samantala naaresto ang 195 indibiduwal sa mga isinagawang police operations kabilang ang mga checkpoint, illegal drug operations, at pagsisilbi ng search warrants.
Hinimok ni P/BGen. Hidalgo ang publiko na makipagtulungan sa mga awtoridad sa checkpoints at inulit ang kanyang pagtiyak na ang mga police personnel ay magmamasid ng mga patakaran at pamamaraan at itataguyod ang kanilang mga batayang karapatan.
Habang nasa checkpoint, pinaalalahanan ang mga motorista na mag-slowdown; i-dim ang kanilang headlights, buksan ang cabin lights at sumagot agad kapag tinatanong ng mga awtoridad.
“I have also reminded our personnel to be courteous to motorists and to adhere to general guidelines prescribed in our Revised Police Operational Procedures,” dagdag ng opisyal.
Ang pagdadala ng mga baril, iba pang nakamamatay na sandata at pampasabog gayondin ang pagbiyahe ay mahigpit na ipinagbabawal mula 28 Agosto hanggang 23 Nobyembre 2023. (MICKA BAUTISTA)
