HATAW! D'yaryo ng Bayan hatawtabloid.com
NASAKOTE ang isang notoryus na holdaper na nambiktima sa isang lalamove rider matapos maaresto ng pulisya sa Malabon City, kahapon ng madaling araw.
Kinilala ni Malabon police chief P/Col. Jay Baybayan ang naarestong suspek na si Kyan Bilyonarnio, nahaharap sa kasong robbery (hold-up).
Batay sa pinagsamang ulat nina P/SSgt. Ernie Baroy at P/SSgt. Bengie Nalogoc, dakong 3:00 am nang maganap ang insidente sa McArthur Highway corner Victoneta Ave., Brgy. Potrero, ng nasabing lungsod.
Dahil sa labis na pagod, sandaling umidlip ang biktimang si Elmer Siervo, 45 anyos, Lalamove rider ng Block 19 Lot 2 Brgy, Caboco, Trese Martires, Cavite sa kanyang motorsiklo, nang bigla siyang lapitan ng suspek na armado ng patalim at tinutukan sabay pahayag ng holdap.
Sa pangamba para sa kanyang kaligtasan, hindi na pumalag ang biktima nang sapilitang kinuha ng suspek ang kanyang cellphone na gamit sa pagla-Lamove saka mabilis na tumakas.
Humingi ng tulong ang biktima sa Malabon Police Sub-Station 1 at sa isinagawang follow-up operation, kasama ang mga tanod ng Brgy. Potrero, agad naaresto ang suspek at nakuha sa kanya ang cellphone ni Siervo at dalawang patalim. (ROMMEL SALES)
