HATAW! D'yaryo ng Bayan hatawtabloid.com
Dinakip ng mga ahente ng Philippine Drug Enforcement Agency (PDEA) ang isang ama at kanyang anak matapos masamsaman ng milyong halaga ng shabu sa isinagawang buy-bust operation sa Malolos City, Bulacan.
Sa pahayag mula sa PDEA, si Anthony Chua, na kinilalang Chinese national, at kanyang anak na si Jay Vie Cai, kapuwa residente ng Pleasant Village sa Barangay San Pablo sa naturang lungsod ay naaresto matapos ang may isang buwang “casing and surveillance”.
Matapos matanggap ang impormasyon mula sa tipsters hinggil sa kinaroroonan ng mga suspek, ang team mula sa PDEA Tarlac at Bulacan Provincial Office ay kaagad pumuwesto sa lugar at nagkasa ng buy-bust operation.
Napag-alamang ang mga suspek ay matagal nang may maramihang reklamo sa komunidad dahil sa kanilang mga transaksiyon sa iligal na droga.
Ayon sa PDEA, narekober sa mag-amang suspek ang isang self sealing plastic bag na naglalaman ng humigit-kumulang sa 500 gramo ng shabu na tinatayang may street value na P3,450,000 at marked money na ginamit ng undercover agent.
Ang mga suspek ay nahaharap sa mga kasong paglabag sa Section 5 (sale of dangerous drugs) kaugnay sa Section 26B (conspiracy to sell) ng Republic Act (RA) 9165 na kilala rin bilang “The Comprehensive Dangerous Drugs Act of 2002.’’ (MICKA BAUTISTA)
