HATAW! D'yaryo ng Bayan hatawtabloid.com
KULONG ang isang 61-anyos lolo dahil sa pambubugbog sa live-in partner na 65-anyos lola matapos komprontahin ng biktima nang mabuking na may panibagong chicka babes ang suspek sa Malabon City, kamakalawa ng hapon.
Galit na inireklamo ni Lola Sylvia, 65 anyos, sa opisyal ng barangay sa kanilang lugar sa Brgy. Tonsuya ang live-in partner na si Lolo David, 61 anyos, isang tricycle driver, matapos siyang pagbuhatan ng kamay.
Dakong 12:30 pm nang magkaroon nang mainitang pagtatalo sa loob ng kanilang tirahan sa Damata, Letre Road ang dalawa nang mabisto ni lola na may bagong ‘sinosyota’ ang kinakasama.
Sa imbestigasyon ni P/SSgt. Mayett Simeon ng Women and Children Protection Desk (WCPD), ginagamit ni Lola ang kanyang cellular phone nang mapansin niyang binago ng kanyang live-in partner ang profile picture sa social media account kasama ang bagong chicka babes.
Dahil sa galit, kinompronta ni Lola Sylvia ang kinakasama na naging dahilan ng kanilang mainitang pagtatalo.
Sa gitna ng komprontasyon, nagalit si Lolo David at inupakan ang kinakasama dahilan upang humingi ng tulong ang biktima sa mga opisyal ng barangay na nagdala sa kanya sa Tondo Medical Center (TMC) upang lapatan ng lunas ang mga pinsala sa katawan.
Dakong 10:30 pm nang madakip nina Arnel Babas at Billy Ray Sindon, kapuwa barangay tanod ng Brgy. Tonsuya si lolo, matapos bigyan ng medico legal certificate ng attending physician sa naturang pagamutan ang biktima.
Ayon sa pulisya, paglabag sa R.A. 9262 o Violence Against Women and Children ang inihain nilang kaso laban kay Lolo David sa Malabon City Prosecutor’s Office. (ROMMEL SALES)
