HATAW! D'yaryo ng Bayan hatawtabloid.com
ARESTADO ang apat na indibidwal habang nasasamsam ang higit sa P100,000 halaga ng hinihinalang shabu nang buwagin ng mga awtoridad ang isang pinaniniwalaang drug den sa Brgy. Dau, lungsod ng Mabalacat, sa lalawigan ng Pampanga nitong Biyernes, 29 Setyembre.
Sa ulat mula sa Philippine Drug Enforcement Agency (PDEA), kinilala ang mga nadakip na suspek na sina Alfredo Pare, Jr., 44 anyos; Paulo Pare, 52 anyos; Joanito Palo, 51 anyos; at Ma. Corazon Galang, 36 anyos, pawang mga residente sa nabanggit na lungsod.
Nadiskubre ng operating teams ang anim na selyadong pakete ng plastic, hinihinalang shabu, may timbang na 15 gramo at tinatayang nagkakahalaga ng P103,600; sari-saring paraphernalia; at ang buybust money.
Isinagawa ang operasyon ng magkasanib na mga elemento ng PDEA- Tarlac, Pampanga PPO, at ng lokal na pulisya ng Mabalacat.
Inihahanda ang kasong paglabag sa RA 9165 o Comprehensive Dangerous Drugs Act of 2002 na isasampa laban sa mga suspek sa hukuman. (MICKA BAUTISTA)
