HATAW! D'yaryo ng Bayan hatawtabloid.com
NABAHAG ang buntot ng dalawang kilabot na holdaper nang pagsalikupan sila ng mga nagrespondeng pulis nang mangholdap sa Malolos City, Bulacan kamakalawa.
Sa ulat na ipinadala kay P/Col. Relly B. Arnedo, provincial director ng Bulacan PNP, sa mabilis na pag-aksiyon ng mga tauhan ng Malolos City Police Station (CPS) ay nadakip ang dalawang indibidwal sa naganap na robbery hold-up sa Brgy. Mabolo, Malolos City, Bulacan.
Kinilala ang mga suspek na sina John Michael Alasa at Allen Kevin Alasa, kapuwa residente sa Brgy. San Juan, Malolos City na taas-kamay na sumuko dahil replika lang pala ang gamit na baril sa panghoholdap.
Nakompiska sa mga arestadong suspek ang mga gamit ng huli nilang biktima at airsoft gun replica na ipinangtututok nila bilang panakot sa mga binibiktima.
Napag-alamang ang dalawang suspek ang itinuturong may kagagawan ng sunod-sunod na panghoholdap at pagnanakaw sa Malolos City at karatig lugar.
Ang mga arestadong suspek ay kasalukuyang nasa kustodiya ng Malolos CPS, samantala kasong kriminal na paglabag sa RPC Article 294 (robbery hold-up) at RA 10591 kaugnay sa paglabag sa Omnibus Election Code ang inihahanda para isampa sa korte. (MICKA BAUTISTA)
