Moira iginiit ‘di siya lasenggera

MA at PA
ni Rommel Placente

BONGGA si Moira dela Torre dahil siya ang first brand ambassador ng Maria Clara Virgin Sangria.

Ipinaliwanag ng mahusay na singer-songwriter sa grand launch niya bilang ambassador ng Maria Clara Virgin Sangria, kung bakit tinanggap niya ang maging endorser nito, kahit isa itong alcohol brand.

Sabi niya, “I had to think about it very well because that’s an alcohol brand, and I really wanted to be careful with my endorsements.”

Pero aminado naman si Moira na kinalakihan niya na ang nasabing inumin, at maging siya ay umiinom nito. Nagustuhan din niya ang campaign nito nang i-present sa kanya.

Ibinahagi nga ni Moira ang isang insidente na nag-TikTok siya habang umiinom nito.

“Naka-tatlong glass po ako. Pagkatapos ko po i-shoot ‘yun, nalasing po ako,” natatawa niyang kuwento.

Pero nilinaw naman niya na hindi siya lasengga.

At hindi naman nakalalasing ang Maria Clara Virgin Sangria dahil non-alcoholic ito.

Sa tanong kay Moira kung sino sa mga kaibigan niya ang gusto niyang makasama habang umiinon ng Maria Clara Virgin Sangria, ang sagot niya ay si KZ Tandingan.

Si KZ kasi ang isa sa mga best friend niya, at madalas niya itong roommate kapag may shows sila sa ibang bansa.

Ikinuwento ni Moria na 4 years ago, nag-ASAP Rome sila at nagkayayaang uminom.

“Sabi ko kay KZ, ako bahala sa ‘yo, aalagaan kita, inom tayo. Ang ending po, siya ang nag-alaga sa akin.

Si Moira ang sumulat at kumanta ng anthem ng Maria Clara Virgin Sangria titled Maria Clara at mapakikinggan na ang song sa Spotify.