Monching laro lang noon ang pag-arte

RATED R
ni Rommel Gonzales

NAKILALA noong 80’s si Ramon Christopher Gutierrez o Monching bilang male teen heartthrob, paano niya maikukompara ang batch nilang mga youngstar noon sa mga kabataang artista ngayon? May mga natutunan ba si Monching sa mga ito?

“Siyempre kahit medyo matagal na tayo sa industriya mayroon pa rin tayong natututunan na bago from the young ones.

“Siguro ‘yung difference nila at saka ako noong kabataan ko, noong ginagawa namin ‘yung ‘Bagets 2’ ang feeling ko naglalaro lang kami.

“‘Yung mga bata ngayon mas serious sila sa trabaho nila, mas nakikinig sila sa direktor, kasi noong araw hindi kami masyadong nakikinig kaya napapagalitan kami,” at tumawa si Monching.

“Feeling namin naglalaro lang kami.

So now I think mas responsable nga sila, pati sa kinikita nila and all that,” pahayag pa ni Monching na kasama sa pelikulang Huling Sayaw na palabas na sa mga sinehan ngayon.

Bida sa Huling Sayaw si Bugoy Cariño.

Mula sa Camerrol Entertainment Productions tampok din sina Belle Mariano bilang si Tiffany at Andy Abellar bilang Stephanie.

Nasa pelikula rin sina Mark Herras, Jeffrey Santos, Christian Vasquez, Emilio Garcia, Jao Mapa, Zeus Collins, Rob Sy, at Mickey Ferriols.

Ang pelikula ay idinirehe at isinulat ni Errol Ropero na isa rin sa mga producer ng pelikula kasama ang mga executive producer na sina Ronald Allan Guinto, Michael Endaya, Hon. Melvin Vergara Vidal, at Hon. Amado Carlos Bolilia IV.