HATAW! D'yaryo ng Bayan hatawtabloid.com
DUMALO si US Ambassador to the Philippines MaryKay Loss Carlson sa turnover ceremony ng Specialized Education and Technical Building ng Philippine Coast Guard (PCG) sa DoTC Road, Barangay Santol, Balagtas, Bulacan, kamakalawa ng hapon.
Kasama ni Carlson sa seremonya si PCG Deputy Commandant for Administration, CG Vice Admiral Ronnie Gil Gavan.
Ang nasabing pasilidad ay sa pagtutulungan ng Estados Unidos at ng Filipinas na gagamitin ng bansa para i-professionalize ang Coast Guard Fleet sailors.
Ang konstruksiyon ng two-story building facility ay nagkakahalaga ng P250-milyon bilang bahagi ng commitment ng gobyernong Amerikano para asistehan ang PCG sa pagpapalakas ng puwersa sa pagbabantay at pagpapanatili ng kaayusan sa karagatan.
Ayon kay Carlson, masaya siya sa inagurasyon ng nasabing pasilidad dahil ito ay isang world class facility at mahalaga ang pagtutulungan ng dalawang bansa para protektahan ang buhay at kabuhayan sa paligid ng Filipinas lalo nitong 11 Setyembre kung kailan ginugunita ang 9/11 incident sa buong mundo.
Aniya, mahalaga ang long time commitment ng Filipinas at Amerika dahil magkasangga ang dalawang bansa sa kaunlaran. Maayos ang alyansa para sa pagliligtas kapag may problema sa karagatan lalo sa pagpoprotekta ng kabuhayan dito.
Ayon sa PCG, magagamit nila ang nasabing pasilidad sa pagsasanay sa navigation, enforcement, at maintenance ng mga sasakyang pandagat.
Sinabi ni PCG Deputy Commandant for Administration, CG Vice Admiral Ronnie Gil Gavan, maraming trabaho ang PCG kaya kailangan din nilang paramihin ang kanilang tauhan para sa mga gampanin ng safety, security at environmental concern sa karagatan.
Patungkol sa ibang isyu, sinabi ni Gavan na mas mapapadalas ang resupply mission sa BRP Sierra Madre dahil ito ay routine activities at may mga stations na rin ang PCG sa mga isla at tumutulong sila sa Philippine Navy para sa re-supply activities.
Ayon kay Gavan, may mga ulat silang natatanggap na may nagaganap pang pambu-bully sa mga mangingisdang Pinoy sa Panatag shoal pero biniberipika pa nila ang nasabing ulat. (MICKA BAUTISTA)
