HATAW! D'yaryo ng Bayan hatawtabloid.com
ISANG batang chess prodigy, nagngangalang Nika Juris Nicolas mula sa Pasig City ang gumawa ng kasaysayan sa chess.
Sa edad na 10-anyos, nabigyan si Nika ng titulong National Master ng National Chess Federation of the Philippines (NCFP) nitong 9 Hunyo 2023.
Nag-iisang babaeng kalahok sa Boys Under 11 Division ng National Youth and Schools Chess Championships Grand Finals, ginanap sa Dapitan City, Zamboanga del Norte mula 2 Hunyo hanggang 9 Hunyo, nagawa ni Nika na magwagi ng mga medalya sa lahat ng kategorya, kabilang ang isang pilak sa Standard, isang pilak sa Blitz, at isang tanso sa Rapid.
Hindi ito ang unang pagkakataon na nakamit ni Nika ang kahanga-hangang tagumpay sa chess.
Nagkampeon na siya sa Under 11 Boys Division ng NCFP National Eliminations sa parehong event na ginanap sa Himamaylan City, Negros Occidental noong 24-27 Marso 2023.
Marami ang nagsabing kapansin-pansin ang kanyang pambihirang pagganap sa boys’ division, at nakuha na niya ang kanyang lugar sa kasaysayan ng chess sa Filipinas bilang kauna-unahan at nag-iisang National Master na batang babae.
Bihira sa mga babaeng naglalaro ng chess ang makipagkompetensiya sa mga Open Division dahil ang karaniwan ay paglahok sa hiwalay na dibisyon para sa kababaihan.
Sa katunayan, ang World Chess Federation (FIDE) ay nagpapanatili ng magkakahiwalay na mga titulo para sa mga lalaki (open category), tulad ng Grandmaster, International Master, FIDE Master, at Candidate Master, na lahat ay nangangailangan ng mas mataas na FIDE rating threshold kompara sa mga babaeng katumbas.
Ang mga katotohanang ito ay naglalantad sa mga umiiral na disparidad ng kasarian sa larangan ng chess. Ang makasaysayang tagumpay ni Nika bilang kauna-unahan at nag-iisang Babaeng Pambansang Master sa Filipinas ay sumisira sa mga hadlang sa lipunan at hinahamon ang karaniwang paniwala ng pangingibabaw ng lalaki sa chess.
Nakatakdang sumabak si Nika sa ASEAN Age Group Chess Championships sa Bangkok, Thailand na nakatakda sa 17-27 Hunyo 2023.
