Lazada delivery man, hinoldap dalawang suspek nasakote

Dahil sa maagap na pagresponde ay kaagad naaresto ng pulisya ang dalawang lalaki nangholdap sa isang delivery man sa Meycauayan City, Bulacan kamakalawa ng hapon, Abril 27.
Sa ulat na ipinadala kay Police Colonel Relly B. Arnedo, provincial director ng Bulacan PPO, kinilala ang mga suspek na sina Jayson Empasis y Valiente alyas Jayson, residente ng No. 34 Kanluran St. Brgy. Caingin, Meycauayan City; at Leonard Dela Cruz y Tortusa alyas Onad, na residente naman ng Blk 61 Lot 2 Magsaysay St., Kamagong Upper Bicutan, Taguig City.

Ayon sa biktima na delivery man ng Lazada, magdedeliber sana siya ng mga parcel sa Meycauayan City nang sabayan siya ng dalawang suspek na sakay ng Yamaha Mio Sporty na may improvised plate No.1301-0167836.

Dito na siya tinutukan ng baril ng mga suspek kasunod ang pagdedeklara ng holdap kaya sa takot ng biktima ay ibinigay niya ang hawak na cash sa mga oras na iyon.

Matapos isagawa ang panghoholdap ay mabilis na tumakas ang mga suspek samantalang ang biktima ay kaagad nagsumbong sa tanggapan ng Meycauayan City Police Station na kagyat namang nagresponde.

Dahil sa naging mabilis ang pag-aksiyon ng kapulisan ng nasabing himpilan ng pulisya, bago tuluyang nakalayo ay naaresto nila ang mga suspek na ngayon ay nakadetine sa Meycauayan CPS custodial facility para sa inquest proceedings.

Inaalam din ng mga awtoridad kung ang dalawang suspek ang sila ring nasa likod ng mga panghohodap sa mga delivery personnel sa naturang lungsod. (Micka Bautista)