Wanted na rapist nasakote sa Bulacan

Sa ika-anim na araw ng sanglinggong Simultaneous Anti-Criminality Law Enforcement Unit (SACLEO) operation ng Bulacan PNP, ay isang wanted na rapist ang matagumpay na naaresto sa Bulacan kamakalawa.

Sa ulat na ipinadala ni Police Lt.Colonel Gilmore Wasin, hepe ng Pandi MPS, kay PColonel Relly B. Arnedo, provincial director ng Bulacan PPO, ang arestadong rapist ay kinilalang si Bartolome Madrid, 47, tubong Cebu Ctiy at kasakuyang naninirahan sa B67 L1 Pandi Heights, Bitukang Manok, Brgy. Cacarong Matanda, Pandi, Bulacan.

Si Madrid na nasa Top 5 Most Wanted sa municipal level ay dinakip ng mga oeratiba ng Pandi MPS kasunod ng warrant na inilabas ng Family Court Branch 6, Sta. Maria, Bulacan, para sa krimeng Statutory Rape.

Napag-alamang matapos masampahan ng kasong panggagahasa ay nagpakatago-tago ang akusado hanggang gawing kanlungan sa pagtatago ang bayan ng Pandi.

Subalit hindi siya nakaligtas sa matatalas na mga operatiba ng Pandi MPS at natunton siya na nagresulta sa kanyang pagkaaresto.

Ang arestadong akusado ay kasalukuyang nasa kustodiya ng Pandi MPS habang inihahanda ang mga kinakailangang dokumento para sa kanyang paglipat sa hukuman na may hawak ng kaso kung saan naganap ang krimen. (Micka Bautista)