HATAW! D'yaryo ng Bayan hatawtabloid.com
Kasalukuyang nilalapatan ng lunas sa pagamutan ang isang abugado matapos pagbabarilin ng mga nakamotorsiklong salarin sa harap ng isang ospital sa Lungsod ng San Fernando, Pampanga kahapon ng umaga, Abril 17.
Sa ulat mula kay PLt.Colonel Preston Bagangan, hepe ng San Fernando City Police Station, ang biktima ng pamamaril ay kinilalang si Atty. Gerome N. Tubig, provincial Legal Officer ng Pampanga.
Samantala, inilarawan ang mga suspek sa krimen na kapuwa nakasuot ng pantalon, black jacket na may stripe at helmet na sakay ng motorsiklo patakas papunta sa direksiyon ng Brgy. Dolores, Lungsod ng San Fernando.
Sa inisyal na imbestigasyon ng pulisya, napag-alamang dakong alas-7:30 ng umaga nang ang biktima ay dumating sa parking lot sa harap ng VL Makabali Hospital sa Brgy. Sto. Rosario, sa naturang lungsod nang biglang sumulpot ang mga nakamotorsiklong suspek gamit ang kulay itim at pulang Aerox.
Dito ay walang sabi-sabing pinagbabaril ng mga suspek ang biktima ng maraming beses gamit ang hindi pa malamang kalibre ng baril at saka mabilis na tumakas patungo sa direksiyon ng Brgy. Dolores..
Kaagad namang isinugod ng mga nagrespondeng mamamayan ang biktima sa loob mismo ng VL Maakabali Hospital para sa agarang medical tratment.
Nagresponde ang mga tauhan mula sa Sub-Station 1 at Sub-Station 2 ng San Fernando CPS at nagsagawa ng flash alarm para sa posibleng pagkaaresto ng mga suspek samantalang ang SOCO mula sa RFU3 ay nagsagawa ng pagproseso sa lugar kung saan naganap ang krimen. (Micka Bautista)
