HATAW! D'yaryo ng Bayan hatawtabloid.com
INARESTO ang 10 indibidwal sa pagpapatuloy ng kampanya ng pulisya sa Bulacan laban sa ilegal na droga, nitong Linggo, 26 Marso.
Sa ulat na ipinadala kay P/Col. Relly Arnedo, Provincial Director ng Bulacan PPO, dinakip ang 10 kataong sangkot sa kalakalan ng droga sa serye ng anti-drug busts na ikinasa ng Station Drug Enforcement Units (SDEUs) ng Meycauayan, Pandi, Guiguinto, at Calumpit C/MPS.
Kabilang sa mga dinakip ang pitong tulak na nakatala sa PNP drug watchlist, kinilalang sina Bryan Joe Maula, alyas BJ; Dante Pascual, Jr., alyas Jon; Joji Flores, Jonathan Reyes, Roberto Lardizabal, alyas Chok; Gio Tolosa, at Romulo Sanglay, alyas Molong.
Isinailalim sa kustodiya ng pulisya sina Roy Catacutan, Maricar Garcia, at Ronel Garcia alyas Tyson na isinasangkot din sa kalakalan ng droga.
Sa kabuuan, nasamsam ng pulisya sa ikinasang mga operasyon ang 36 pakete ng hinihinalang shabu, sari-saring drug paraphernalia, at buy-bust money.
Ayon kay P/Col. Arnedo, nagpapatunay ito na ang pulisya sa Bulacan ay nagpapakita ng katapangan at dedikasyon sa pagsupil ng ilegal na droga.
Ito ay nakahanay sa direktiba ni Regional Director PRO3 Jose Hidalgo, Jr., na mapanatili ang momentum na ang rehiyon kabilang ang Bulacan ay maging drug-free area. (MICKA BAUTISTA)
