HATAW! D'yaryo ng Bayan hatawtabloid.com
MA at PA
ni Rommel Placente
SA Showbiz Update vlog ni Ogie Diaz, napag-usapan nila nina Mama Loi at Mrena ang trending video ng motivational speaker na si Rendor Labador na matapang nitong tinawag ang pansin ni Coco Martin sa isinasagawang taping sa Quiapo ng serye nitong FPJ’s Batang Quiapo.
May hindi raw kasing magandang epekto ito sa mga nagtitinda sa Quiapo. Kumbaga, nakaiistorbo raw ang taping at nawawalan daw ng kita ang mga nagtitinda roon dahil pinapaalis.
Sabi ni Ogie, “’Pag motivational speaker ka, dapat hinay lang sa pagsasalita. Huwag ‘yung parang nananakot ka na parang siga ba. Huwag ‘yung ganoon. Siyempre ‘yung mga ganyan, hindi naman basta pumunta lang sa Quiapo at nag-shooting. Humingi ‘yan ng permit sa barangay, humingi ‘yan ng permit sa city hall.”
Dagdag pa niya, “Hindi ba dapat ang kino-call out mo o ‘yung dapat na sinasabihan mo ‘yung barangay doon na sumasakop sa Quiapo? Hindi ba dapat ang sinasabihan mo ay ‘yung Mayor’s Office? ‘Di ba sila dapat. Kasi hindi naman sila matutuloy doon kung hindi sila pinayagan.”
Bagama’t naiintindihan ni Ogie at pinuri pa nito ang pagmamalasakit ni Rendon sa mga Quiapo vendor, pinuna naman nito ang naging pamamaraan ni Rendon ng pag-call out kay Coco at sa produksiyon ng FPJ’s Batang Quiapo, na aniya ay sumobra.
“Sana ‘yung mahinay lang. Malay mo pakinggan ka ‘pag mahinay ka. Huwag natin pairalin ‘yung pagiging siga.
“Huwag na tayong naninindak, huwag ng nananakot. Ang importante maipahatid mo ‘yung mensahe mo sa maayos at mahinahon at malumanay na paraan,” aniya pa.
