HATAW! D'yaryo ng Bayan hatawtabloid.com
PATAY ang dalawa katao habang dalawang iba pa ang sugatan sa isang sunog na sumiklab sa isang residential area sa Quezon City, Lunes ng umaga.
Kinilala ang mga namatay na sina Lophel Dioso, 50, at Ghian Andrew, 16, kapwa residente sa naturang lugar.
Samantala, ang sugatan naman ay kinilalang sina Mike Milallos at Gelin Dioso, 48, may mga paso sa mukha, kamay, balikat, at braso.
Batay sa ulat ng Bureau of Fire Protection (BFP), dakong 6:58 am nang sumiklab ang sunog sa Kalayaan B 6 Alley St., Brgy. Batasan Hills, Quezon City.
Umabot ito sa unang alarma bago naideklarang under control dakong 7:06 am at tuluyang naapula pagsapit ng 8:15 am.
Masusing iniimbestigahan ng mga awtoridad ang sunog upang matukoy ang pinagmulan nito, gayondin ang halaga ng mga ari-ariang tinupok ng apoy.
Samantala, 15 kabahayan ang naabo sa sunog na naganap sa Calamba St., Brgy. Talayan QC, bandang 12:20 pm.
Umakyat sa unang alarma ang naturang sunog at bandang 2:01 pm nang ideklarang fire out.
Kasalukuyang nanunuluyan sa covered court sa lugar ang mga nasunugan habang nagsasagawa ng imbestigasyon sa sanhi ng sunog. (ALMAR DANGUILAN)
