HATAW! D'yaryo ng Bayan hatawtabloid.com
MAGKAKASUNOD na nadakip ng mga awtoridad ang 11 indibidwal na pawang may paglabag sa batas sa pinaigting na kampanya ng pulisya laban sa kriminalidad sa lalawigan ng Bulacan nitong Sabado, 4 Pebrero.
Sa ulat kay P/Col. Relly Arnedo, Provincial Director ng Bulacan PPO, unang nadakip ang walong personalidad sa droga na kinilalang sina Esmeraldo Balili, alyas Tatay, Melvin Ablaza, Querubin Sayco, alyas Gerbin, John Kenneth Dela Cruz, alyas Bubi, John Lenard Kevin Antallan, Louigie Cruz, alyas Egie, Jessie De Vera, at Anthony Biala, alyas Tonio.
Nasakote ang mga suspek sa anti-illegal drug operations na ikinasa ng Station Drug Enforcement Unit (SDEU) ng San Ildefonso at Norzagaray MPS.
Nakompiska sa operasyon ang 21 pakete ng plastic ng hinihinalang shabu, iba pang drug paraphernalia, at buybust money.
Gayondin, naaresto ang suspek na kinilalang si Romenick Dalangin ng Brgy. Tibag, Baliuag ng tracker team ng Pulilan MPS sa bisa ng warrant of arrest sa kasong Theft (RPC ART 308) alinsunod sa Art. 309 ng RPC na inamyendahan ng Sec. 81 ng RA 1059.
Kasalukuyang nakapiit ang akusado sa Pulilan MPS para sa dokumentasyon at imbestigasyon.
Samantala, natimbog rin ang suspek na kinilalang si Michael Flores ng Brgy. Bagong Buhay 2, San Jose del Monte, ng mga nagrespondeng tauhan ng San Jose Del Monte CPS sa kasong robbery, na naganap dakong 10:00 pm kamakalawa sa Rancho Bawang, Brgy. Bagong Buhay 3, sa lungsod.
Napag-alamang hinarang ng suspek sa daan ang isang residente habang pauwi sa kanilang bahay, tinutukan ng patalim, saka nagdeklara ng holdap at sapilitang kinuha ang pitaka na naglalaman ng pera ng biktima.
Nadakip din si Osmondo Paraiso, alyas Bobot ng Brgy. Catacte, Bustos, ng mga tauhan ng Bustos MPS para sa kasong physical injury kaugnay ng paglabag sa RA 9262 na naganap kamakalawa ng umaga sa naturang barangay.
Kasalukuyan nang inihahanda ang mga kasong kriminal na nakatakdang isampa sa mga arestadong suspek. (MICKA BAUTISTA)
