HVT na Chinese national nakorner sa buy-bust ops

NASAKOTE ng mga awtoridad ang isang dayuhang hinihinalang tulak ng ipinagbabawal na droga sa ikinasang anti-illegal drug operation sa lungsod ng Angeles, lalawigan ng Pampanga, nitong Sabado, 21 Enero.

Batay sa ulat ni P/Col. Juritz Rara, hepe ng Angeles CPO, nagsagawa ang mga operatiba ng Angeles City PS4 ng anti-illegal drug bust operation sa Brgy. Balibago na nagresulta sa pagkakadakip sa suspek na kinilalang si Anping Hu, alyas Intsik, Chinese national, kasalukuyang naninirahan sa Gogo Hotel, Brgy. Pulung Maragul, sa nabanggit na lungsod.

Nasamsam mula sa suspek ang apat na piraso ng selyadong pakete ng plastic na naglalaman ng hinihinalang shabu, may timbang na 15 gramo at tinatayang may halagang  P102,000; at P1,000 marked money.

Pahayag ni PRO3 Regional Director P/BGen. Cesar Pasiwen, ang suspek ay mahaharap sa kasong paglabag sa  Republic Act 9165 o Comprehensive Dangerous Drugs Act of 2002 na nakatakdang isampa sa korte. (MICKA BAUTISTA)