HATAW! D'yaryo ng Bayan hatawtabloid.com
ARESTADO ang 12 indibidwal na naaktohang bumabatak ng ilegal na droga sa lungsod ng San Jose del Monte, lalawigan ng Bulacan, nitong Martes ng gabi, 3 Enero.
Sa ulat kay P/Col. Relly Arnedo, provincial director ng Bulacan PPO, dakong 9:00 pm kamakalawa nang magkasa ng anti-illegal drugs operation ang mga tauhan ng San Jose del Monte CPS sa Barrio Mausok Compound, Area B, Purok 1, Brgy. Bagong Buhay 1, sa nabanggit na lungsod.
Nagresulta ang operasyon sa pagkabaklas ng isang ‘batakan’ (drug den) at pagkakadakip sa 12 drug users sa naturang barangay.
Kinilala ang mga suspek na sina Dominick Torente, 20 anyos; Edwin Diaropa, 45 anyos; Marvin Aguas, 35 anyos; Raymond Barro, 36 anyos; Carolyn Broto, 32 anyos; Crizaldy Cabrera, 40 anyos; Jobert Baccay, 30 anyos; Jose Arca, 29 anyos; Bernardo Tenerife, 56 anyos; Jefferson Estandian, 32 anyos; Ricardo Gonzales, 60 anyos; at Victor Evangelista, 45 anyos.
Nakompiska mula sa mga suspek ang drug paraphernalia, marked money, at 33 pakete ng hinihinalang shabu na tinatayang nagkakahalaga ng P26,000 at tumitimbang ng mahigit sa apat na gramo.
Gayondin, nasukol ang lima pang drug peddlers sa ikinasang serye ng mga drug sting operation ng Station Drug Enforcement Units (SDEU) ng police stations ng Plaridel, Guiguinto, at Bocaue kung saan nakompiska ang 13 pakete ng hinihinalang shabu at buy-bust money.
Samantala, nadakip ang isang lalaking nakatala bilang most wanted person sa provincial-level na kinilalang si alyas Cyrus, isang Child in Conflict with the Law (CICL), mula sa Brgy. San Agustin, sa lungsod ng Malolos.
Ayon sa warrant na inilabas ng Malolos City RTC Branch 4, wanted si alyas Cyrus sa kasong Lascivious Conduct na paglabag sa Section 5 (B) ng RA 7610.
Naaresto ng mga tracker team mula sa mga police stations ng San Rafael, Hagonoy, at San Ildefonso ang tatlong wanted na indibidwal matapos isilbi ang arrest warrants sa iba’t ibang paglabag sa batas. (MICKA BAUTISTA)
