HATAW! D'yaryo ng Bayan hatawtabloid.com
ISA-ISANG bumagsak sa kamay ng batas ang limang drug traffickers at limang pugante sa operasyong inilatag ng mga awtoridad sa lalawigan ng Bulacan hanggang nitong Martes, 20 Disyembre.
Ayon kay P/Col. Relly Arnedo, provincial director ng Bulacan PPO, arestado ang limang personalidad na sinabing sangkot sa illegal na droga, sa buy-bust operations na isinagawa ng Station Drug Enforcement Unit (SDEU) ng mga himpilan ng pulisya ng Pulilan, San Jose del Monte, at Meycauayan.
Kinilala ang suspek na sina Romeo Javier, alyas Raven, ng Bgry. Tambubong, San Rafael; Francis Ollet, alyas Nobis ng Brgy. Sto. Cristo, San Jose del Monte; Eniseo Mercado ng Brgy. Sto Cristo, Pulilan; Rowie Toy-toy ng Brgy. Caingin, Meycauayan; at Riza Miano, alyas Taba ng Brgy. Malanday, Valenzuela.
Nasamsam mula sa mga suspek ang kabuuang 24 pakete ng hinihinalang shabu, coin purse, at buy-bust money habang inihahanda ang pagsasampa ng nararapat na kaso laban sa kanila.
Kasunod nito, nadakip ang lima kataong punaghahanap at pinananagot sa batas ng iba’t ibang manhunt operations ng tracker teams mula sa Meycauayan CPS, San Jose del Monte CPS, at 1st Provincial Mobile Force Company (PMFC) na sinuportahan ng mga elemento mula sa Malolos CPS at 301st MC RMFB3.
Dinampot ang mga suspek para sa mga kasong Qualified Theft, Estafa, at paglabag sa BP 22 at kasalukuyang nasa kustodiya ng kani-kanilang arresting unit/stations para sa nararapat na disposisyon. (MICKA BAUTISTA)
