HATAW! D'yaryo ng Bayan hatawtabloid.com
MAGKASUNOD na nadakip ng mga awtoridad sa lalawigan ng Bulacan ang dalawang lalaking matagal nang pinaghahanap ng batas kaugnay sa mga kasong nakasampa laban sa kanila.
Sa ulat na ipinadala kay P/Col. Relly Arnedo, provincial director ng Bulacan PPO, naaresto ng mga operatiba ng Bulacan PPO ang suspek na kinilalang si Ronald Maranan, nakatala bilang regional most wanted person sa PRO4-A.
Nabatid, matapos sampahan ng kasong rape sa hukuman, nagpagkatago-tago ang akusado hanggang masukol ng mga awtoridad sa kanyang pinagtataguan sa Bulacan.
Inaresto si Maranan sa bisa ng warrant of arrest sa kasong rape na inilabas ni Presiding Judge Corazon Domingo-Ranola, ng Malolos City RTC Branch 10, may petsang 11 Marso 2014.
Kasunod nito, nasakote ng mga tauhan ng Bulacan PPO si Christian San Pedro, nakatala bilang rank no. 1 most wanted person sa lalawigan.
Naaresto si San Pedro sa bisa ng warrant of arrest sa kasong robbery na inilabas ni Presiding Judge Lyn Llamasares-Gonzales ng Malolos City RTC Branch 78. (MICKA BAUTISTA)
