Sa Sta. Maria, Bulacan
BANGKAY NG BINATANG NALUNOD SA ILOG NATAGPUAN NA

MAKALIPAS ang dalawang araw na paghahanap, natagpuan ng mga awtoridad nitong Martes ng umaga, 1 Nobyembre, ang bangkay ng isang binatang nalunod sa ilog sa bayan ng Sta. Maria, lalawigan ng Bulacan, noong Linggo ng hapon, 30 Oktubre.

Ayon kay Konsehal Jess De Guzman ng Sta.Maria at siyang nanguna sa isinagawang search and retrieval operation, dakong 9:30 am kahapon nang matagpuan ang bangkay ng biktimang kinilalang si Dave Roldan Constantino, 19 anyos, residente sa Brgy. San Jose Patag, sa naturang bayan.

Natagpuan ang inaanod na bangkay ng biktima sa bahagi ng Paso Bagbaguin, halos tatlong kilometro ang layo, kung saan siya nalunod sa tulay ng Macaiban.

Sa ulat mula sa mga tauhan ng Sta. Maria MPS, dakong 2:00 pm noong Linggo nang tangkain ng biktima at tatlong kasama na tawirin ang Macaiban Bridge ng Sta. Maria River na noon ay nakalubog sa baha ngunit sinawing palad na siya ay matangay ng malakas na agos sa ilog.

Tinangkang sagipin ng mga kasama at ilang residente sa lugar ang biktima ngunit hindi na nila nagawa pa hanggang tuluyang lamunin sa malalim na bahagi ng ilog at tuluyang mawala sa kanilang paningin.

Dalawang araw na nagtulong-tulong ang mga tauhan ng Sta. Maria MDRRMO, Sta. Maria MPS, Philippine Army, at Philippine Coast Guard sa paggalugad sa bahagi ng Sta. Maria River hanggang matagpuan ang labi ng biktima. (MICKA BAUTISTA)