HATAW! D'yaryo ng Bayan hatawtabloid.com
NAARESTO ng mga awtoridad ang pinuno ng isang notoryus na ‘criminal gang’ sa isinagawang operasyon sa bayan ng Plaridel, lalawigan ng Bulacan, nitong Lunes, 31 Oktubre.
Kinilala ni P/Col. Relly Arnedo, provincial director ng Bulacan PPO, ang suspek na si Jannel Contreras, alyas Miyaw, 33 anyos, nadakip ng mga tauhan ng Provincial Intelligence Unit (PIU) sa drug buy-bust operation sa Brgy. Sta. Ines, sa nabanggit na bayan dakong 5:40 pm kamakalawa.
Nakatala si alyas Miyaw, lider ng Contreras Criminal Gang na responsable sa mga insidente ng holdapan at carnapping sa lalawigan, at bilang PRO3 – Regional Priority High Value Individual at Provincial High Value Individual ng Bulacan.
Nakompiska sa suspek ang apat na pakete ng hinihinalang shabu, may timbang na limang gramo at tinatayang nagkakahalaga ng P34,000; at marked money. (MICKA BAUTISTA)
