HATAW! D'yaryo ng Bayan hatawtabloid.com
INARESTO ng mga awtoridad ang isang dayuhan matapos ireklamo ng pananakit sa kinakasamang Pinay sa Mabalacat City, Pampanga, kamakalawa ng umaga.
Sa ulat mula sa tanggapan ni PBGeneral Cesar Pasiwen, PRO3 regional director, ang arestadong dayuhan ay si Ma Yichun, 24-anyos, Chinese national at kasalukuyang naninirahan sa The Sharp Clarkhills, Clark Freeport Zone, Mabalacat City, Pampanga.
Ang suspek ay inaresto ng mga awtoridad matapos na ang kanyang live-in partner na itinago sa pangalang alyas “Emma”, 24-anyos, at residente ng Sta. Rita, Purok 4, Concepcion, Tarlac ay nagsumbong sa mga awtoridad na siya ay inaabusong pisikal ng kinakasamang dayuhan.
Lumitaw sa inisyal na imbestigasyon na bago ang pangyayari, ang biktima ay tumangging sumalo ng pagkain kay Yichun na ikinabalisa ng huli.
Pagkatapos nito ay dito na nagwala ang suspek at sinakal ang leeg ng biktima hanggang kinaladkad sa kanyang kuwarto at inumpog sa pader.
Nahaharap sa kasong paglabag sa RA 9262 (An Act Defining Violence Against Women and their Children) ang kasalukuyang inihahanda laban sa suspek para sa court referral. (MICKA BAUTISTA)
