HATAW! D'yaryo ng Bayan hatawtabloid.com
NASAMSAM ng mga awtoridad ang higit sa P400-milyong halaga ng hinihinalang shabu sa isinagawang anti-illegal drug operations sa bayan ng Mexico, lalawigan ng Pampanga, nitong Miyerkoles, 14 Setyembre.
Sa ulat mula kay PRO3 Regional Director P/BGen. Cesar Pasiwen, nagkasa ang magkasanib na mga operatiba ng SOU NCR at IFLD PNP-DEG katuwang ang Pampanga PPO at PDEA NCR ng anti-illegal drug operations sa Lakeshore sa bahagi ng NLEX, sa nabanggit na bayan kung saan nadakip ang mga suspek na kapwa Chinese nationals na kinilalang sina Wenjie Chen alyas Harry, 45 anyos, residente ng Brgy. San Antonio, Gerona, Tarlac; at Sy Yan Qing, 42 anyos, na residente ng Brgy. Sto. Domingo, Angeles, Pampanga.
Nakumpiska mula sa dalawa ang 60 piraso ng vacuum-sealed plastic Chinese tea bags na naglalaman na may timbang 60 kilo ng hinihinalang shabu na tinatayang nagkakahalaga ng P408,000,000; P5,000 marked money; celphone; mga iba’t ibang identification cards at dokumento.
Lumitaw sa imbestigasyon na ang dalawa ay nasa pangkat ng tinatawag na Coplan Apocalypto na nabatid na mga notoryus sa pagkakalat ng maramihang droga sa mga lugar sa Metro Manila, Regions 3, at 4-A. (Micka Bautista)
