HATAW! D'yaryo ng Bayan hatawtabloid.com
INARESTO ng mga awtoridad ang isang puganteng may kinakaharap na kasong panggagahasa mula sa kanyang pinagtataguan sa lungsod ng Angeles, lalawigan ng Pampanga, nitong Martes ng umaga, 30 Agosto.
Sa bisa ng isinilbing warrant of arrest, hindi na nagawang makapalag ng akusadong kinilalang si Edward Salonga, 30 anyos, driver, residente sa Dinalupihan, Bataan.
Isinagawa ang pagdakip sa suspek dakong 10:50 am kamakalawa sa Purok 4, Brgy. Pulungbulu, sa nabanggit na lungsod, sa bisa ng arrest warrant na nilagdaan ni Presiding Judge Katrina Nora S. Buan-Factora ng Angeles City RTC Branch 101-Family Court.
Nahaharap si Salonga sa tatlong bilang ng kasong Qualified Rape na walang inirekomendang piyansa para sa pansamantalang kalayaan.
Naging matagumpay ang pag-aresto sa suspek sa pangunguna ng pinagsanib na puwersa ng CIT – Angeles RIU3 sa superbisyon ni P/Maj. Cherry Tirasol, RIDMB3, PHPT-Angeles, CIDG/CFU-Angeles, CIU/ACPO, CIDMU/ACPO, Porac MPS, at ng Angeles CPS sa ilalim ng superbisyon ni P/Maj. Agnes Nolasco.
Kasalukuyang nakakulong ang suspek sa Angeles City Jail matapos isailalim sa nararapat na proseso. (MICKA BAUTISTA)
