HATAW! D'yaryo ng Bayan hatawtabloid.com
NASAMSAM ang P120,000 halaga ng hinihinalang shabu mula sa live-in partners sa ikinasang drug buy bust operation sa bayan ng Bay, lalawigan ng Laguna, nitong Sabado, 6 Agosto.
Kinilala ni P/Col. Cecilio Ison, Jr., ang mga suspek na sina Regin Bangay, 37 anyos, construction worker; at Jacquelyn Tobias, 32 anyos, kapwa mga residente sa Brgy. Tranca, Grandvilla, sa nabanggit na bayan.
Inilunsad ng Bay MPS sa pangunguna ni P/Maj. Jameson Aguilar ang isang anti-illegal drug operation 9:25 pm kamakalawa sa naturang lugar sa pakikipag-ugnayan sa Philippine Drug Enforcement Unit (PDEA) 4A.
Huli sa akto ang mga suspek na nagbebenta ng isang sachet ng hinihinalang shabu sa pulis na nagsilbing poseur buyer kapalit ng P1,000 marked money.
Narekober mula sa mga suspek ang 12 sachet ng hinihinalang shabu na inilagay sa isang pouch; P400 hinihinalang drug money; at P1,000 buy bust money.
Nabatid, ang suspek na si Bangay ay nauna nang naaresto noong 2013 sa isang drug buy bust operation sa Calauan dahil sa pagmamay-ari at pagbebenta ng shabu at noong 2019 dahil sa pag-iingat ng shabu, habang si Tobias ay naaresto sa Pangil dahil sa pagmamay-ari at pagbebenta ng shabu.
Nasa kustodiya ng Bay MPS ang mga suspek habang nakatakdang sampahan ng kasong paglabag sa Section 5 at 11 Artcicle II ng RA 9165 o Comprehensive Dangerous Drugs Act of 2022 sa Prosecutor’s Office.
Pahayag ni P/Col. Ison, “Nakalulungkot na pati ang mga magulang ay parehong involved sa illegal drugs, at inilalagay sa panganib at pag-agaw sa kinabukasan ng kanilang mga anak. Hindi makalkula ang masamang epekto ng mga mapanganib na droga sa kalusugan at sa kalidad ng buhay ng gumagamit, ng kanyang pamilya, at ng mga makakaharap nila. Pero isang bagay ang sigurado, nakadedesmaya. Laging bukas ang mga linya ng telepono para sa ating mga kababayan na mag-ulat ng anumang impormasyon tungkol sa mga ilegal na aktibidad na kanilang nasasaksihan sa kanilang lokalidad. Sa pamamagitan nito, matutulungan natin ang bawat barangay na maalis ang mga mapanganib na droga at ang mga krimen na maaaring gawin ng mga lulong sa droga laban sa kanila.”
Ani P/BGen. Antonio Yarra, “Magpapatuloy kami sa paglulunsad ng mga operasyon laban sa ilegal na droga upang maaresto ang mga suspek na nasa likod ng mga suspek na sangkot sa kalakalan ng droga sa kabila ng pinaigting na kampanya laban sa ilegal na droga.” (BOY PALATINO)
