SA PAGPAPATULOY ng PRO3 PNP sa kanilang hakbang laban sa illegal gambling, iniulat ni Regional Director P/BGen. Matthew Baccay, nadakip nila ang 23 katao nitong Sabado, 6 Agosto sa iba’t ibang lugar sa Gitnang Luzon.
Nagsagawa ang mga operatiba ng Bulacan PPO ng anti-illegal gambling operation sa No. 558 Purok 4 Brgy. Parulan, Plaridel, na ikinaaresto ng limang indibidwal na naaktohang nagsusugal ng pusoy.
Nakompiska ng mga operatiba sa mga suspek ang isang deck ng baraha, at P590 perang taya sa iba’t ibang denominasyon.
Kasunod nito, pinagdadampot ng mga tauhan ng Tarlac PPO ang 10 kataong naaktohan sa pagsusugal ng poker at tong-its sa magkahiwalay na anti-illegal gambling operations na isinagawa sa mga bayan ng Concepcion, San Miguel, at Bamban, sa Tarlac.
Nasamsam mula sa mga suspek ang dalawang set ng baraha, isang set ng Spanish playing cards, at P2,875 perang taya.
Sa Zambales, nagkasa ang mga operatiba ng Sta Cruz MPS at RMFB3 ng magkahiwalay na anti-illegal gambling operations sa Brgy. Lucapon North, Sta.Cruz; at Brgy. Calapacuan, Subic, kung saan nasukol ang walong indibiduwal na naaktohan sa sugal na cara y cruz at tong-its at nakompiskahan ng P2,392 perang taya.
Nakatakdang sampahan ang mga arestadong suspek ng kasong paglabag sa PD 1602 na inamyendahan ng RA 9287 sa korte. (MICKA BAUTISTA)