HATAW! D'yaryo ng Bayan hatawtabloid.com
PABONGGAHAN
ni Glen P. Sibonga
NAG-UUMAPAW sa kasiyahan si Direk Vince Tanada dahil ang pelikulang Katips na kanyang idinerehe, ipinrodyus at isinulat ay itinanghal na Best Picture sa ginanap na 70th FAMAS Awards noong July 30. Idagdag pa riyan ang Best Director at Best Actor awards na parehong iniuwi ni Vince, na bihirang mangyari sa isang awards night.
Big winner nga ang Katips sa FAMAS dahil bukod sa naturang major awards na napanalunan nito ay nagwagi rin para sa naturang pelikula sina Johnrey Rivas—Best Supporting Actor; Manuel Abanto—Best Cinematography; Pipo Cifra—Best Musical Score; at Best Original Song naman ang Sa Gitna ng Dulo (music by Pipo Cifra, lyrics by Vince Tanada).
Hindi man nanalo, proud pa rin sa kanilang nominasyon sina Jerome Ponce (Best Actor), Nicole Laurel Asensio(Best Actress), Adelle Ibarrientos (Best Supporting Actress), Mon Confiado (Best Supporting Actor), at ang iba pang nominado sa technical categories.
Para kay Direk Vince, feeling vindicated siya dahil sa maraming awards na napanalunan ng Katips matapos hindi mapabilang sa official entries ng 2021 Metro Manila Film Festival. Iyon pa nga lang 17 nominasyon sa FAMAS na nakuha ng Katips ay patunay na maganda ang pelikula. Ngayon ay nagwagi pa ito ng maraming awards.
Matapos mahinto ang pagpapalabas noong isang taon dahil sa muling pagtaas ng COVID-19 cases, ang Katips ay muling ipalalabas sa mga sinehan nationwide sa August 3, 2022.
