HATAW! D'yaryo ng Bayan hatawtabloid.com
HATAWAN
ni Ed de Leon
KUNG nasasabik nga ang dating soloist ng River Maya at solo artist nang si Rico Blanco na makabalik sa isang concert sa Araneta Coliseum, mas lalo namang excited ang fans na muli siyang mapanood. Aba eh noong media conference pa lamang ng concert, nagkakagulo ang fans nang masilip sa loob si Rico, at kahit na nasa labas sila, tuloy sila sa pagkuha ng pictures. At nang kawayan sila niyon, nagsigawan talaga sila. Kitang-kita mo ang pananabik nila sa singer. Ibig sabihin, oras ngang magsimula na iyang bentahan ng tickets sa Ticketnet ngayong araw na ito, malalaman natin kung gaano karami ang bubuhos na tao sa September 11.
Nakapag-concert na rin naman si Rico bago ang pandemic diyan sa Big Dome at napuno niya talaga iyon. Kaya wala kaming duda na ang proyektong iyan ng KDR Music ay magiging isang malaking hit.
Ang isa pang plus factor, KDR Music nga ang kanyang producer, kaya bukod sa kakabit sa promo niyon ang Wish 107.5, na kinikilalang isang malakas na estasyon sa FM, hindi maikakaila na may captive market iyang KDR na nakasuporta sa lahat ng kanilang proyekto.
May mga guest artist din si Rico sa kanyang concert, pero hindi pa niya sinabing lahat dahil naniniwala siyang ang announcement niyon ay dapat magmula sa KDR.
Iyang KDR ay nagsisimula nang makilala bilang isang malaking concert producer, isipin ninyong sa susunod na buwan, bukod sa major concert ni Rico, may concert din sila ng The Juans sa Araneta rin iyon.
